ઉના તાલુકાના ભાચા ગામે સસ્તા અનાજ નું વેચાણ: ₹46,590નો મુદ્દામાલ જપ્ત, એક શખ્સ સામે કાર્યવાહી
ઉના, 18જુલાઈ:ઉના તાલુકાના ભાચા ગામના પ્લોટ વિસ્તારમાંથી સરકારી અનાજની ગેરકાયદેસર હેરાફેરીનો પર્દાફાશ થયો છે. પુરવઠા વિભાગે બાતમીના આધારે કાર્યવાહી કરીને લાભાર્થીઓ પાસેથી ખરીદેલું ₹46,590ની કિંમતનું સરકારી અનાજ અને અન્ય મુદ્દામાલ જપ્ત કર્યો છે. આ પ્રકરણમાં દાનિશ અફઝલ વાલિયાણી નામના એક શખ્સ સામે કાયદેસરની કાર્યવાહી હાથ ધરવામાં આવી છે.પ્રાપ્ત માહિતી અનુસાર, મામલતદાર ભીમાણીને ભાચા ગામના પ્લોટ વિસ્તારમાં કેટલાક શખ્સો દ્વારા સરકારી અનાજનો ગેરકાયદેસર સંગ્રહ અને હેરાફેરી કરવામાં આવતી હોવાની ચોક્કસ બાતમી મળી હતી. આ બાતમીના આધારે, નાયબ મામલતદાર તેજલબેન જોશીની આગેવાની હેઠળ પુરવઠા વિભાગનો સ્ટાફ તાત્કાલિક ઘટનાસ્થળે પહોંચ્યો હતો.સ્થળ પર તપાસ કરતા, એક રિક્ષામાંથી સરકારી અનાજનો મોટો જથ્થો મળી આવ્યો હતો. જેમાં 120 કિલો ઘઉં અને 90 કિલો ચોખાનો સમાવેશ થાય છે. આ અનાજ ગરીબ અને જરૂરિયાતમંદ લાભાર્થીઓને વિતરણ કરવા માટે હોય છે, પરંતુ તેને ગેરકાયદેસર રીતે સંગ્રહ કરીને કાળાબજારમાં વેચવાનો પ્રયાસ કરવામાં આવી રહ્યો હતો.પુરવઠા વિભાગના અધિકારીઓએ અનાજના જથ્થા ઉપરાંત, એક વજનકાંટો અને એક છકડો રિક્ષા પણ જપ્ત કરી હતી. જપ્ત કરાયેલા કુલ મુદ્દામાલની કિંમત ₹46,590 આંકવામાં આવી છે.
આ પ્રકરણમાં મુખ્ય આરોપી તરીકે દાનિશ અફઝલ વાલિયાણીનું નામ ખુલ્યું છે. પુરવઠા વિભાગ દ્વારા તેની સામે આવશ્યક કાયદેસરની કાર્યવાહી શરૂ કરવામાં આવી છે. આ કાર્યવાહી દર્શાવે છે કે સરકારી અનાજની ગેરકાયદેસર હેરાફેરી કરનારાઓ સામે તંત્ર કડક પગલાં ભરવા કટિબદ્ધ છે. આવા કિસ્સાઓ અટકાવવા અને જરૂરિયાતમંદો સુધી સરકારી યોજનાઓનો લાભ પહોંચે તે સુનિશ્ચિત કરવા માટે પુરવઠા વિભાગ દ્વારા ભવિષ્યમાં પણ આવી કાર્યવાહી ચાલુ રાખવામાં આવશે તેમ જાણવા મળ્યું છે.
રિપોર્ટર ધર્મેશ ચાવડા
