ગીર સોમનાથ પોલીસની સરાહનીય પહેલ: નેશનલ હાઈવે પર રખડતા પશુઓને રિફ્લેક્ટર બેલ્ટ પહેરાવી અકસ્માત નિવારણનો પ્રયાસ

ગીર સોમનાથ પોલીસની સરાહનીય પહેલ: નેશનલ હાઈવે પર રખડતા પશુઓને રિફ્લેક્ટર બેલ્ટ પહેરાવી અકસ્માત નિવારણનો પ્રયાસ

વેરાવળ/ઉના |

ગુજરાત રાજ્યમાં માર્ગ અકસ્માતોની વધતી સંખ્યાને ધ્યાનમાં રાખીને અને લોકોમાં માર્ગ સલામતી અંગે જાગૃતિ લાવવા માટે સમગ્ર રાજ્યમાં હાલ “રાષ્ટ્રીય માર્ગ સલામતી માસ-૨૦૨૬” ની ઉજવણી કરવામાં આવી રહી છે. આ અભિયાન અંતર્ગત ગીર સોમનાથ જિલ્લા પોલીસ દ્વારા નેશનલ હાઈવે-૫૧ પર એક અનોખી અને માનવતાભરી પહેલ હાથ ધરવામાં આવી છે, જે વાહન ચાલકો તેમજ નિર્દોષ પશુઓ – બંને માટે જીવનરક્ષક સાબિત થઈ શકે છે.

રાત્રિના અકસ્માતો રોકવા નવી દિશામાં પગલું

ગીર સોમનાથ જિલ્લામાંથી પસાર થતો નેશનલ હાઈવે-૫૧ ખાસ કરીને રાત્રિના સમયે જોખમભર્યો બની જાય છે. અનેક વખત રખડતા પશુઓ રસ્તાની વચ્ચે બેઠા કે સૂતા હોય છે, જે અંધારામાં વાહન ચાલકોને સમયસર નજરે ન પડતા ગંભીર અકસ્માતો સર્જાય છે. આ સમસ્યાને ધ્યાને રાખી ગીર સોમનાથ પોલીસે એક વ્યવહારુ અને અસરકારક ઉકેલ અમલમાં મૂક્યો છે.

રિફ્લેક્ટર બેલ્ટ દ્વારા અકસ્માત નિવારણ

જિલ્લા પોલીસ દ્વારા વેરાવળથી ઉના સુધીના નેશનલ હાઈવે-૫૧, ઉના શહેર તેમજ પ્રભાસ પાટણ વિસ્તારના રખડતા પશુઓને રેડિયમ રિફ્લેક્ટર બેલ્ટ પહેરાવવામાં આવ્યા. આ બેલ્ટ રાત્રિના સમયે વાહનોની લાઈટ પડતા દૂરથી જ ચમકે છે, જેના કારણે વાહન ચાલકોને પશુઓની હાજરી અંગે પૂર્વ સૂચના મળી રહે છે અને સમયસર વાહન નિયંત્રણમાં લઈ શકાય છે.

આ સમગ્ર અભિયાન દરમિયાન અંદાજે ૨૦૦ જેટલા પશુઓને રિફ્લેક્ટર બેલ્ટ પહેરાવી સુરક્ષિત કરવામાં આવ્યા હતા.

ઉચ્ચ અધિકારીઓના માર્ગદર્શન હેઠળ કામગીરી

આ માર્ગ સલામતી અભિયાન પોલીસ મહાનિરીક્ષકશ્રી, સ્ટેટ ટ્રાફિક બ્રાન્ચ – ગાંધીનગરના આદેશ અનુસાર તા. ૦૧ જાન્યુઆરીથી ૩૧ જાન્યુઆરી ૨૦૨૬ દરમિયાન યોજાઈ રહ્યું છે.

જૂનાગઢ રેન્જના આઈ.જી.પી. શ્રી નિલેશ જાજડીયા તથા ગીર સોમનાથ જિલ્લાના પોલીસ અધિક્ષક શ્રી જયદિપસિંહ જાડેજાના માર્ગદર્શન હેઠળ જિલ્લા પોલીસ દ્વારા વિવિધ જનજાગૃતિસભર કાર્યક્રમો હાથ ધરવામાં આવી રહ્યા છે.

પોલીસ-ગૌરક્ષકોનો સંયુક્ત પ્રયાસ

આ સેવાકીય કામગીરીમાં જિલ્લા ટ્રાફિક શાખાના પો.સબ.ઇન્સ. શ્રી વી.એન. મોરવાડીયા, ઉના પો.ઇન્સ. શ્રી એન.બી. ચૌહાણ તથા પ્રભાસ પાટણ પો.ઇન્સ. શ્રી એચ.આર. ગોસ્વામી પોતાની ટીમ સાથે ખડેપગે રહ્યા હતા. આ ઉપરાંત સ્થાનિક ગૌરક્ષકોના સહયોગથી પશુઓને સલામત રીતે પકડીને તેમને રિફ્લેક્ટર બેલ્ટ પહેરાવવામાં આવ્યા હતા.

વાહન ચાલકોમાં સંતોષ અને સુરક્ષાનો અહેસાસ

પોલીસની આ પહેલથી હાઈવે પર મુસાફરી કરતા વાહન ચાલકોમાં સુરક્ષાનો અહેસાસ વધ્યો છે. અંધારામાં દૂરથી જ પશુઓના ગળામાં ચમકતા રિફ્લેક્ટર નજરે પડતા હોવાથી અકસ્માતની શક્યતાઓમાં નોંધપાત્ર ઘટાડો થશે, એવું વાહન ચાલકો માની રહ્યા છે.ગીર સોમનાથ પોલીસની આ માનવતાભરી અને જવાબદાર કામગીરી માત્ર માર્ગ અકસ્માતોને અટકાવશે નહીં, પરંતુ પશુઓના જીવ બચાવવામાં પણ મહત્વની ભૂમિકા ભજવશે. આ પહેલને લોકો તરફથી વખાણ મળી રહ્યા છે અને અન્ય જિલ્લાઓ માટે પણ તે એક પ્રેરણારૂપ ઉદાહરણ બની છે.

રિપોર્ટર ધર્મેશ ચાવડા