ઊના: દિવાળી પહેલા બજારમાં બનવાટી ઘી અને મીઠાઈના વેચાણ અંગે ચિંતા, આરોગ્ય વિભાગ દ્વારા તાકીદે ચેકિંગની માંગ
ઊના: સમગ્ર રાજ્યની જેમ ઊનામાં પણ દિવાળીના તહેવારનો માહોલ જામી ગયો છે. બજારોમાં મીઠાઈ, ફરસાણ અને બેકરીની વસ્તુઓની ખરીદી માટે ગ્રાહકોની ભારે ભીડ જોવા મળી રહી છે. જોકે, તહેવારોની આ ખુશીઓ વચ્ચે ખાદ્ય પદાર્થોની ગુણવત્તાને લઈને એક ગંભીર ચિંતાજનક પરિસ્થિતિ ઊભી થઈ છે. લોકોના આરોગ્ય સાથે ચેડાં થવાની ભીતિને પગલે આરોગ્ય વિભાગ અને ફૂડ સેફ્ટી વિભાગ દ્વારા ત્વરિત અને સઘન ચેકિંગ હાથ ધરવાની માંગ ઉઠી છે.બનાવટી ખાદ્ય વસ્તુઓનું વેચાણ વધવાની શક્યતા દિવાળીના તહેવારમાં મીઠાઈઓ અને ફરસાણની માંગમાં અનેકગણો વધારો થાય છે. આ વધતી માંગનો ફાયદો ઉઠાવીને કેટલાક વેપારીઓ નફાખોરી માટે ગ્રાહકોના સ્વાસ્થ્ય સાથે જોખમ ઊભું કરે છે. બજારમાં અનેક જગ્યાએ બનાવટી ઘી, નકલી માવો, ભેળસેળયુક્ત દૂધ અને નબળી ગુણવત્તાના તેલમાંથી બનેલી મીઠાઈઓ તથા ફરસાણનું વેચાણ થતું હોવાના અહેવાલો મળે છે. આ પ્રકારના ખાદ્ય પદાર્થોનું સેવન કરવાથી લોકોને સ્વાસ્થ્ય સંબંધિત ગંભીર સમસ્યાઓ થઈ શકે છે.
જિલ્લા સ્તરે તાત્કાલિક ચેકિંગ અભિયાનની માંગ
સ્થાનિક જાગૃત નાગરિકો અને ગ્રાહક સુરક્ષા જૂથો દ્વારા આરોગ્ય વિભાગ તથા ફૂડ સેફ્ટી વિભાગને તાત્કાલિક ધોરણે જિલ્લા સ્તરે એક વ્યાપક ચેકિંગ અભિયાન શરૂ કરવા માટે માંગણી કરવામાં આવી છે. તેમની માંગ છે કે મીઠાઈની દુકાનો, ફરસાણની દુકાનો અને ઉત્પાદન એકમોમાં આકસ્મિક તપાસ હાથ ધરી ખાદ્ય પદાર્થોના સેમ્પલ લેવામાં આવે અને તેનું લેબોરેટરીમાં પરીક્ષણ કરવામાં આવે.
ફૂડ સેફ્ટી એક્ટ હેઠળ કડક કાર્યવાહીની માંગ
લોકોની સ્પષ્ટ માંગ છે કે જે દુકાનદાર કે ઉત્પાદક લોકોના આરોગ્ય સાથે ચેડાં કરીને ભેળસેળયુક્ત કે નકલી વસ્તુઓનું વેચાણ કરે છે, તેમના વિરુદ્ધ ફૂડ સેફ્ટી એન્ડ સ્ટાન્ડર્ડ એક્ટ, 2006 હેઠળ કાયદેસરની અને કડક કાર્યવાહી થવી જોઈએ, જેથી અન્ય વેપારીઓ પણ આવી પ્રવૃત્તિઓ કરતા અટકે.ગ્રાહકો માટે અપીલ: ગુણવત્તા તપાસો
આરોગ્ય વિભાગ દ્વારા ગ્રાહકોને પણ તકેદારી રાખવા અપીલ કરવામાં આવી છે. કોઈપણ મીઠાઈ કે ફરસાણ ખરીદતા પહેલા ગ્રાહકોએ તેની બનાવટની તારીખ, એક્સપાયરી ડેટ, લેબલ અને ગુણવત્તા ચોક્કસપણે ચકાસવી જોઈએ. દિવાળીના તહેવારની ખરીદીમાં ગુણવત્તા સાથે કોઈપણ પ્રકારનું સમાધાન ન કરવું જોઈએ, કારણ કે સાચું અને સ્વસ્થ્ય આહાર જ દિવાળીની સાચી ઉજવણી ગણાય.આગામી દિવસોમાં આરોગ્ય વિભાગ આ માંગણી પર કેવો પ્રતિસાદ આપે છે અને ચેકિંગ અભિયાન હાથ ધરે છે કે કેમ, તે જોવું રહ્યું.
રિપોર્ટર ધર્મેશ ચાવડા
